Úr viðjum vanans
Halla Gunnarsdóttir, blaðamaður
Netfang: halla[at]mbl.is
Tími: 1 1/2 klst.

Í fyrirlestrinum kynnir Halla Gunnarsdóttir fræðsluefni og tillögur að námsefni fyrir grunnskóla um kynmótun og kynferðislegt ofbeldi.
Því miður er það svo hérlendis sem í öðrum löndum að óhugnanlega mörg börn eru beitt kynferðislegu ofbeldi. Óbirt íslensk rannsókn leiddi í ljós að 23% stelpna og 8% drengja eru misnotuð kynferðislega fyrir 18 ára aldur.
Það þýðir að í þrjátíu barna bekk með jöfnu kynjahlutfalli mætti ætla að þrjár til fjórar stúlkur og einn drengur séu fórnarlömb kynferðislegs ofbeldis. Auk þess er mörgum íslenskum unglingum, aðallega stúlkum, nauðgað á ári hverju. Vegna þeirrar staðreyndar að skömmin býr hjá fórnarlambinu frekar en ofbeldismanninum er það svo að fæst þessara vandamála rata upp á yfirborðið.

Tilgangurinn með verkefninu er að fræða kennara um þennan erfiða málaflokk enda er grunnskólinn eina stofnunin sem hefur möguleika á að ná til heilu kynslóðanna. Með bættri fræðslu má greiða þolendum leið til þess að segja frá ofbeldi sem þessu og um leið koma skýrum skilaboðum á framfæri til hugsanlegra gerenda.

Halla býður enn upp á fyrirlestur fyrir grunnskólakennara eða aðra sem áhuga hafa. Fyrirlesturinn tekur eina og hálfa klukkustund að meðtöldum umræðum. Farið er yfir umfang og eðli kynferðislegs ofbeldis, lög um tilkynningarskyldu fagstétta og lagðar fram hugmyndir um hvernig kennarar geta staðið að kennslu um kynferðislegt ofbeldi.